Dy persona janë arrestuar nga policia e Lezhës rreth mesnatës, pasi në automjetin me të cilën qarkullonin u gjetën një armë zjarri dhe municione.
Astrit Shekaj dhe Armando Vulaj janë vënë në pranga.
Aksioni
“Bazuar dhe në informacionet e marra në rrugë operative, për një shtetas që qarkullonte me armë zjarri në automjet është organizuar dhe finalizuar operacioni policor i koduar ‘Mesnata’, në kuadër të të cilit Forca e Posaçme ‘Shqiponja’ në DVP Lezhë, në bashkëpunim më Komisariatin e Policisë Lezhë, në vendin e quajtur ‘Rrethrrotullimi i Shëngjinit’, kanë lokalizuar dhe ndaluar mjetin e dyshuar. Gjatë kontrollit të ushtruar në automjetin tip ‘Range Rover’, me drejtues shtetasin Astrit Shekaj, dhe pasagjer shtetasin Armando Vulaj, në bagazhin e këtij automjeti është gjetur një armë zjarri automatik me krehër me fishekë, të cilat u sekuestruan në cilësinë e provës materiale, së bashku me automjetin, njoftoi policia.
Në përfundim të veprimeve, nga specialistët për Hetimin e Krimit në Komisariatin e Policisë Lezhë u bë arrestimi në flagrancë i shtetasve Astrit Shekaj, 37 vjeç dhe Armando Vulaj, 27 vjeç, banues në Malësi të Madhe, të dy të dënuar më parë për trafikim të lëndëve narkotike”, shtuan të njëjtat burime.
Të arrestuarit akuzohen për veprat penale “Mbajtja pa leje e armëve dhe e municionit” dhe “Moskallëzimi i krimit”.
