Sfida e boksit mes britanikut Tyson Fury dhe amerikanit Deontay Wilder, zhvilluar më 9 tetor në Las Vegas, është përzgjedhur nga fansat e këtij sporti si “Dueli më i Bukur i Vitit 2021”. Një përballje e fituar nga Fury me KO në raundin e 11-të, duke mbrojtur titullin kampion bote në peshën e rëndë (WBC).
Nga fansat e boksit është konsideruar si një sfidë “thriller”, si një film i vërtetë, ku të dy boksierët ranë në tapet. Kjo ishte përballja e tretë mes Tyson Fury e Deontay Wilder në karrierën e tyre, teksa sfida e parë kishte përfunduar barazim dhe ajo e dytë ishte fituar nga Fury, po me “KO teknik”.
Të dy boksierët e meritonin fitoren për atë që dhanë në ring, por Fury arriti të jetë më i fuqishëm dhe të shkatërrojë Wilder, që me kalimin e raundeve humbi forcën e tij. Të gjithë u shprehën se kjo është një nga sfidat më të bukura në historinë e boksit, ku emocionet ishin të mëdha deri në fund.
