Nga Boldnews.al
Jeta e natës në Tiranën e ndërrimit të viteve, duket se do të kalojë me 100 kilogramë kokainë mangut.
Një operacion policor i raportuar në mënyrë gjysmake konfirmoi zbulimin e 109 kilogramë lëndë narkotike “bosash”, pikërisht në 30 dhjetor, një ditë para festës popullore, e cila pritet të mbushë lokalet e shtrenjta, Komiteti i Ekspertëve vendosi që Covid-19 nuk do të ngatërrohet me Babagjyshin.
Sasia e konsiderueshme e kokainës u zbulua në një kontenier bananesh, i cili po udhëtonte drejt magazinave të kompanisë “Zico Kompany”, në Vaqarr të Tiranës.
Policia e Shtetit shpërndau një komunikatë paraprake, e cila krijonte më shumë mjegull dhe dukej se tentonte të shfajësonte kompaninë e bananeve.
Kjo “mjegullnajë”, në fakt, nisi që në raportimet e para mediatike, mbrëmjen e së Enjtes.
Televizionet me titra shpërndanë në mënyrë simultante informacionin nga “burime policore”, megjithëse askund nuk përmendej kompania pritëse e kontenierit me banane.
Reporterët e policisë, me shumë mundësi e kishin mësuar menjëherë se për cilën kompani bëhej fjalë.
Por, reklama e “xhaxhi Arditit me shokun e tij majmun” duket se i bllokoi redaksitë për të treguar se bananet “BanaKing” po shkon drejt “Zico Company” në pronësi të Trifon Murataj.
Pas këtij hezitimi paraprak të redaksive mediatike, edhe Policia nuk u tregua aspak e qartë në raportimin e saj për publikun.
Policia deklaroi se operacioni ishte kryer pas një informacioni “rastësor”.
“Strukturat hetimore në Departamentin e Policisë Kriminale në Policinë e Shtetit kanë marë informacion se disa persona ende të paidentifikuar kanë ndaluar në Romanat të Durrësit, një kamion që transportonte një kontenier të ngarkuar me banane nga porti i Durrësit, për një magazinë në Vaqarr.”
Më tej, vijohet: “Përgjatë rrugës nacionale Durrës – Tiranë, në vendin e quajtur Romanat, kamioni që transportonte kontenierin është ndaluar nga persona ende të paidentifikuar, të cilët për disa minuta kanë ushtruar kontroll në kamion dhe kontenierin me banane dhe më pas janë larguar me shpejtësi pas kontrollit të kontenierit. Për këtë situatë, përfaqësuesit e firmës importuese të bananeve kanë njoftuar Policinë e Shtetit.”
Pas mbërritjes së policisë, “Si rezultat i reagimit të menjëhershëm dhe veprimeve hetimore të koordinuara u bë e mundur gjetja e kontenierit të ngarkuar me banane. Gjatë kontrollit në brendësi të tij, shërbimet e Policisë gjetën dhe sekuestruan në cilësinë e provës materiale 119 kilogramë lëndë të dyshuar narkotike kokainë.”
Pra, Policia ka paraqitur një situatë “hollivudiane”, në të cilën disa persona të paidentifikuar, të cilët kishin informacione për kokainën në kontenier, kanë bllokuar kamionin, por nuk kanë gjetur lëndë narkotike.
Më pas, policia, e njoftuar nga vetë kompania, ka arritur tek kamioni, ka bërë kontroll e më pas ka gjetur kokainën që nuk e gjetën “grabitësit”.
Pra, gjithcka lihet të kuptohet se kompania nuk ishte në dijeni të ngarkesës me kokainë.
Por, ndërkohë mbetet e paqartë se, përse në këto kushte, policia ka arrestuar dy shoferët e kamionit dhe administratorin e “Zico Company”, i cili është njëkohësisht edhe djali i pronarit.
Po ashtu, nuk ka asnjë të dhënë se si është arritur të kalohet kjo sasi e madhe kokaine nga Policia e Durrësit dhe skaneri në port.
Duket se gjithçka mbetet nga kjo histori është “Arditi dhe majmuni” i reklamës së “BanaKing”.
