Hiqet tarifa për dëshminë e listës së notave për studentët në Fakultetin e Shkencave Sociale. Lajmin e konfirmon lëvizja “Për Universitetin”, që njofton se vendimi erdhi pas një peticioni.
“Sot, 20 ditë pas dorëzimit të peticionit me 900 firmat e mbledhura mes studentëve dhe pedagogëve të Fakultetit të Shkencave Sociale, arritëm heqjen zyrtare të tarifës absurde për dëshminë e listës së notave për studentët. Kjo ishte një fitore e vogël, por ajo na tregon se përmes vullnetit kolektiv jeta universitare mund të përmirësohet vazhdimisht”, thuhet në njoftim.
“Lëvizja” shton se do të synohet heqja e tarifës nga të gjitha universitetet publike.
“Si aktivistë të Lëvizjes Për Universitetin jemi të vendosur që këtë përpjekje ta shtrijmë në të gjithë fakultetet e universiteteve publike, në Tiranë e anembanë vendit. Besimi që qindra studentë u dhanë katër prej aktivistëve tanë për t’i përfaqësuar ata në Këshillat Studentorë, është një përgjegjësi dhe mundësi shtesë për ngritjen e një organizimi kapilar të studentëve. Të bashkuar, zëri ynë do të buçasë”, thuhet më tej në njoftim.
