Kryeministri Edi Rama vijon show dhe propagandën lidhur me procesin e rindërtimit, ku sot ishte në Bubq, nga ku njoftoi se objektivi i qeverisë është që brenda kësaj dekade të strehohen të gjitha familjet që janë në nevojë, por të ndihmohen edhe çiftet e reja.
“Po përgatitemi për një reformë për strehimin, pasi është për të qeshur sot, se të qarat i kaluam në momentin e fatkeqësisë. Me një program të ri dhe me cfarë kemi mësuar dhe me FSHZH-në që ka qenë lokomotiva ne duam që në këtë dekadë të bëjmë me shtëpi edhe shumë familje të tjera që nuk kanë mundësi që ta blejnë me të ardhurat e tyre dhe t’u japim mundësinë edhe shumë shqiptarëve, pavarësisht bindjeve të kenë një strehë për fëmijët e tyre.
Do të fillojmë projektet e strehimit për njerëzit që kanë nevojë, qoftë për çiftet e reja. Për ata që duan të ndërtojnë një jetë të re dhe nuk e kanë të lehtë të shkojnë të marrin kredi nga bankat”, tha ai.
Gjithashtu Rama iu rikthye akuzave dhe presioneve ndaj drejtësisë, ndërsa sulmoi një gjyqtar që sipas tij ka bllokuar procesin e rindërtimit.
“Një gjykatës që nuk ka për t’ja dalë t’i shmanget kësaj përgjegjësie të madhe, ka dhënë një sigurim padie për të bllokuar, për të bllokuar procesin e rindërtimit, se i teket njërit dhe thotë “nuk dua unë” dhe pallati që duhet të shembej dhe janë gjithë ato familje që preken. Del një gjykatës dhe e bllokon” tha Rama, pa bërë publik emrin e magjistratit.
Por Rama nuk ka lënë jashtë vëmendjes edhe situatën në PD, ku Lulzim Basha prej kohësh merret me ndërrime bravash të dyerve të zyrave të selisë.
“Kujdes me bravat, ruajuni nga ndërrimi i bravave, nga bllokimi dhe çelësat, si i thonë, anglez quhet në gjuhën teknike, ka edhe një tjetër në gjuhën shqipe, por nuk po e them, e keni parasysh vetë, çelës si ai që të ngelet në derë. Unë e di që në Bubq ka shumë demokratë, ju u roj shëndet.
Kjo sëmundja që i ka zënë demokratët me bravat, nuk është çështje e qeverisë dhe as e socialistëve. Kush do që të mos ketë problem me bravën, të bëhet socialist. Ne prapë do u qëndrojmë afër dhe komshinjtë socialistë do të ndihmojnë në zhbllokimin e bravave të komshinjve demokratë” tha ai.
Më vjen mirë me demokratët e bravave. Do hyjnë në shtëpi dhe do më kujtojnë mua. Këtë nuk kanë si e shmangin. Pastaj do më shajnë. Aman se lekët e popullit janë, nuk ka bërë ndonjë gjë. Drejtori i shkollës këtu më tha shkolla jonë ka më shumë banjo se sa kishte gjithë Bubqi. Për këtë jam në këtë detyrë. Për të lënë një emër të mirë dhe për të mos iu ndarë demokratëve si hije gjithë jetën. Si hije që kur rrëzohesh, të jep dorën dhe të thotë çohu se jemi bashkë”, tha Rama.
