Policia ka shoqëruar 3 persona, banorë në Laç dhe Tiranë, si të dyshuar për grabitjen e ndodhur më 11 dhjetor në Sarandë, ku nga kasaforta e një supermarketi, u grabitën 200 mln lekë.
Sipas raportimeve, mësohet se policia ka siguruar pamjet nga një kamera e fshehur, ndërsa autorët e dyshuar të grabitjes, kishin marrë DVR kryesore të kamerave të supermarktit, duke menduar se nuk kishte kamera të tjera.
Nga pamjet e sekuestruara, dallohen 3 të rinj të veshur me kostume sportive me kapuç, me maskë COVID që transportojnë disa çanta, ku dyshohet se janë paratë e marra nga kasaforta.
Në një filmim tjetër, dallohet njëri prej të rinjve, që hidhet nga kati i dytë i godinës, midis disa çarçafëve të nderur.
Nga raportimet thuhet se 3 personat janë shoqëruar nga policia e Tiranës dhe po merren në pyetje nga grupi hetimor.
