Deputeti Belind Këlliçi ka reaguar ndaj kritereve të caktuara nga grupi i punës i ngritur nga Lulzim Basha, lidhur me zgjedhjet në FRPD.
Këlliçi shprehet se çdo vendim i Lulzim Bashës, i shkarkuar nga posti i kreut të PD nga Kuvendi i 11 dhjetorit, vendim i ratifikuar edhe nga referendumi i anëtarësisë më 18 dhjetor, është nul dhe nuk ka asnjë vlerë.
“Në vazhdimësi të shkeljeve të statutit të PD dhe FRPD, deputeti Lulzim Basha ka nxjerrë sot në një deklaratë për mediat një grup të rinjsh që kanë folur rreth procesit zgjedhor në FRPD.
Ju rikujtojmë të gjithë të rinjve demokratë se këto manovra për të kapur këtë institucion janë të kota dhe pa vlerë.
Kryesia e FRPD ka marrë një vendim në datën 12 Nëntor 2021 që i hap rrugë procesit të zgjedhjeve dhe asnjë institucion tjetër nuk mund të mbivendoset mbi këtë vendim’, shkruan Këlliçi në rrjetin social.
Në 13 dhjetor, Belind Këlliçi akuzoi Lulzim Bashën për ndërrimin e bravave të dyerve të FRPD-së si dhe për vjedhjen e sendeve personale në zyrën e tij të punës. Madje deputeti demokrat bëri edhe njv kallëzim në polici.
