Albi Bashaliu, 35 vjeç, u ekzekutua mëngjesin e sotëm në fshatin Gjoçaj në Peqin. Viktima ndodhej në rrugë kur u qëllua me armë zjarri nga persona ende të paidentifikuar nga policia.
Nga të dhënat e para mësohet se krimi mund të jetë kryer për hakmarrje, pasi vëllai i viktimës ndodhet në burg i dënuar për vrasje. Raportohet se vrasja mund të jetë kryer nga më shumë se 1 autor.
Njoftimi nga policia
“Më datë 27.12.2021, rreth orës 08.39, në fshatin Gjoçaj Peqin, në rrethana ende të paqarta dyshohet se është vrarë me armë zjarri, në rrugë, shtetasi A. B., rreth 35 vjeç, banues në fshatin Gjoçaj, Peqin.
Shërbimet e Policisë kanë shkuar menjëherë në vendngjarje së bashku me grupin hetimor.
Është rrethuar zona dhe vijon krehja e saj për të bërë të mundur kapjen e autorit/ëve”, njoftoi policia.
Grupi hetimor nën drejtimin e Prokurorisë vijon punën për zbardhjen e rrethaneve të ngjarjes, sekuestrimin e çdo prove të mundshme materiale që shërben për identifikimin e autorëve.
