Tirana udhëheq Superioren pas 15 javëve të para dhe diferenca me vendin e dytë Kukësin është 5 pikë. Viti u mbyll me fitoren në derbin me Partizanin që motivon më shumë grupin. Skuadra ka funksionuar siç duhet sipas trajnerit Orges Shehi, pasi hyjnë në fushë me mentalitetin e duhur.
“Nuk kemi pasur shumë momente të këqija, por kemi qenë shumë mirë me mentalitetin duke menduar që kjo që iku duhet harruar shpejt dhe të përqendrohemi te tjetra për të arritur atë që duam”.
Gjithsesi trajneri i Tiranës thotë për Tv Klan se do të jetë e lehtë të fitojnë trofeun në fund, që është objektivi i klubit.
“Në një kampionat kaq të gjatë që është ky i joni me skuadra që kanë shumë pak diferencë nga njëra-tjetra nuk do t’i përjashtoja edhe ato të treja që janë larguar pak”.
Bardheblutë janë ekipi i dytë që ka shënuar më shumë pas Kukësit dhe që ka pësuar më pak. Për Orges Shehin lojtarët duhet të ndihmojnë pavarësisht pozicionit që kanë në fushë.
“Deri diku kemi bërë mirë dhe kemi punuar në këtë aspekt. Ajo fazë e gjatë përgatitore na shërbeu. Po fusim mentalitetin që të gjithë duhet të sulmojmë dhe të mbrojmë”.
Pritet që skuadra të afrojë lojtarë gjatë Janarit, ku në sulm nevojitet më shumë pas lëndimit të Michael Ngoo.
