Në historinë e interpretimit të vlerave individuale të futbollistëve nëpër kompeticionet kombëtare apo ndërkombëtare të cilat konkretizohen në aktivizimin e tyre gjatë 90 minutave, nuk janë kopje të njëra-tjetrës. Por, le të fokusohemi dhe të flasim për çështjen e Armando Brojës te Kombëtarja shqiptare”.
Kështu e nis intervistën e tij për “Panorama Sport” ish-mbrojtësi legjendar i Kombëtares shqiptare, Teodor Vaso. Korçari ka analizuar mosaktivizimin e sulmuesit në ekipin përfaqësues duke u ndalur te cilësitë e tij, si dhe atë çka e ndalon, sipas tij, trajnerin Reja që të mos i japë minuta të plota 20- vjeçarit.
E ka luksin Shqipëria të lërë jashtë një lojtar që luan në atë nivel?
Vlerat futbollistike të ekipit tonë kombëtar nuk e kanë luksin që të lënë jashtë formacionit asnjë lojtar me kapacitete vlerash si ato të Brojës. Aktivizimi i tyre lidhet dhe me keqshfrytëzimin apo jo të vlerave të tyre nga trajnerët. Le të vijmë më konkretisht për të cilësuar sa e si duhet të aktivizohet një lojtar me cilësitë e Brojës dhe vetë Broja.
Sa e si duhet të aktivizohet Armando Broja me ekipin kombëtar dhe pse?
Kjo, për arsye se aktivizimi ose mosaktivizimi është i papërshtatshëm sepse i rëndon të dy. Nëse themi të mos luajë, rëndojmë lojtarin dhe nëse themi “po”, rendojmë trajnerin.
Si mendoni ju që duhet të veprohet?
Broja duhet të luajë pa diskutim në formacionin startues ose në çdo ndeshje brenda 90 minutave. Në lojën e Armandos dallojmë cilësinë e parë që impresionon në lojën me topin dhe shpejtësi në tentativat e tij për driblim apo kalim të mbrojtësve kundërshtarë. Loja e tij me topin ka cilësi të konfirmuara të klasit të lartë në veprimet tekniko-taktike.
Po atëherë, sipas jush, ku qëndron rezervimi që bën trajneri Edi Reja në minutat e aktivizimit të tij?
Ka talente të rralla që loja e tyre del jashtë kornizës së lojës kolektive. Kur ata nuk bashkëveprojnë me shokët e skuadrës, krijojnë disi mangësi në produktin e lojës. Atëherë, në lojën e Brojës, për ata që i dallojnë elementet cilësore se si luan një lojtar, përveç cilësive shumë të mira të tij, mendoj se dallohet disi mangësi në lojën kombinative me top, pasi problemi i tij me pasimin vjen si mungesë e shikimit periferik.
Nëse do të flasim për Mesin, Ronaldon, Maradonën apo Panajot Panon, loja e tyre individuale ka prodhuar një efikasitet shumë të madh dhe këto veprime individuale kanë një përqindje të lartë pozitive në finalizim.
Të qenët titullar në një ekip si Sauthempton nuk është kusht apo tregues për të luajtur me një ekip kombëtar futbolli i padiskutueshëm dhe si titullar.
Kur Broja do të kalojë me lojën e tij në një efikasitet të lartë finalizimi, ose ta themi ndryshe të fitojë statujën e një lojtari të madh, atëherë nuk ka nevojë për të pyetur duhet të luajë apo jo.
/Panoramasport
