Lulzim Basha nuk dha sot një përgjigje të prerë lidhur me zhvillimin e protestave nga opozita, apo se kur ai mendonte se opozita duhej të protestonte.
“Opozita do të udhëheqë dhe ka udhëhequr të gjitha protestat që ka thirrur dhe u ka dalë në ballë. Ku e di ti, që nuk do të bëhet protestë për këtë. Këtu nuk janë vjedhur të dhënat e opozitës, por të gjithë qytetarëve.
Mendoni se opozita po pengon protestat? Kur ta thërrasim do ta bëjmë publike. Nuk do ta mbajmë sekret. Që jemi në gjendje të organizojmë protesta madhështore e kemi treguar mos keni dyshim se do ta bëjmë, por koha sot është të fokusohemi te këto dy skandale”, deklaroi ai, duke pasur parasysh aferën e inceneratorëve dhe publikimin e të dhënave sensitive dhe pagave të qytetarëve.
Por, ai ka humbur qetësinë kur u pyet lidhur me protestat, ndërsa duke iu drejtuar gazetarit i tha: po ti pse nuk proteston, pse nuk e bën detyrën qytetare?
Basha tha se lista e pagave që është publikuar është si skema e patronazhistëve, është sigurimi i ri i shtetit.
” Edi Rama po përpiqet që të fshehë që shteti është kthyer në një organizatë kriminale. Shteti i nxori lakuriq për t’i kontrolluar, jetën private, marrëdhëniet personale, private, të familjarëve.
Kjo tregon kthimin e Shqipërisë në “parti-shtet”. Janë vjedhur të dhënat për të shantazhuar. Mekanizmi dhe produkti është i qartë. Dilni nga flluska e Trekëndëshit të Bermundës dhe shikoni cfarë konsumojnë shqiptarët. SPAK ka shumë punë, por duhet të bëjë prioritetet”, tha Basha.
