“Fute dorën në xhep, nxjerr sa lekë të mundesh dhe jepua të varfërve. Bëhuni postierë gëzimi.”
Ky është mesazhi i imzot George Frendo për të gjithë shqiptarët dhe shqiptaret për Krishtlindjen.
Nëpërmjet një prononcimi për mediet, imzot Frendo kërkon nga të gjithë që të ndihmojnë me aq mundësi sa kanë të varfrit dhe personat në nevojë.
“Gëzuar Krishtlinjden! Nuk kemi të drejtë ta mbajmë gëzimin vetëm për vete. Duhet ta ndajmë me të tjerët. Fute dorën në xhep, nxjerr lekë sa të mundesh, jepua të varfërve dhe ata kanë të drejtë për pak gëzim. Në këtë mënyrë të siguroj se do të bëhesh më i pasur, se sa ke qenë më parë, sepse ke fituar një thesar në qiell. A mund të mendoni se në këtë moment ka një person në nevojë të veçantë që mund të ndash gëzimin me të? A mund të bëhesh për të postier, apo postiere gëzimi, duke i dhuruar buzëqeshjen tënde, dashurinë tëndë, edhe ndoshta ndonjë dhuratë të vogël. A ka afër shtëpisë tënde një plak, ose një çift pleqësh që banojnë vetëm, dhe nuk kanë pasur asnjë njeri për t’i uruar Krishtlindjen? Këtë duhet ta bëjmë dhe ne por edhe politikanët që kanë në dorë fatin e vendit tonë. Përzemërsisht juve dhe familjeve tuaj, ju uroj gëzuar Krishtlindjet dhe Vitin e Ri”, tha ai.
