Lulzim Basha u shpreh se ata që i kërkojnë që të lirojë zyrën e kreut të PD brenda datës 5 janar, tregon se ata e kanë mendjen te karrigia.
“Ne nuk na plas për karriget, meqë atyre i rri mendja te karrigia”, tha Basha, duke iu përgjigjur kërkesës së Komisionit të Rithemelimit të PD-së. Basha tha se i kërkonte ndjesë qytetarëve që disa njerëz që e kishin mendjen vetëm te karriget i kanë shpëtuar filtrave opozitarë.
Basha tha se PD e ka të qartë veprimin e saj opozitar kundër Qeverisë dhe Edi Ramës.
“Hajdutët, që e kanë vendin në burg se e kanë rrjepur Partinë Demokratike, janë e shkuara, duhet të shkojnë me pranga në burg, nëse do të ketë drejtësi, ndërsa na dalin në studio si filozofë, dhe e kanë mendjen te karriget”, tha Basha.
“Se kanë mendjen shqiptarët te karriget. Te karriget e kanë vetëm ata që paskan qenë në këtë beteje për karrige. Fatkeqësi e madhe dhe ndjesë shqiptarëve që filtrat tonë kanë dështuar dhe prodhuar edhe njerëz të cilët mendjen në këtë kohë që ju s’keni para për të mbushur tavolinën për fëmijët tuaj e kanë te karriget e tyre. Megjithatë PD i ka marrë vendimet e veta dhe do i qëndrojë atyre deri në fund.
Kuvendi i 18 Dhjetorit është jo vetëm ndarje me të shkuarën, por është dhe përqafimi i të ardhmes, zgjedhje e të ardhmes jo vetëm për ne, por dhe për shqiptarët. Ndaj çdo veprim i PD do jetë në funksion të njerëzve, në funksion të halleve të tyre. Nuk na plas për karriget e atyre që paskan qenë këtu vetëm për karrige”, tha Basha.
Ai u shpreh se Komisioni i Rithemelimit është ai i qofteve dhe bilardove. “Mos harxhoni kohën me këto komisione, mos tërhiqni vëmendjen nga tangetopuli shqiptar, skandali i inceneratorëve dhe ai i publikimit të të dhënave”, tha ai.
