I ftuar në A Show me Adi Krastën në SYRI TV, ish-presidenti i Republikës Bujar Nishani i ka kërkuar Lulzim Bashës të mos vijojë më me provokimin e tij ndaj vullnetit të 44 mijë anëtarëve të Partisë Demokratike.
Nishani ka paralajmëruar Bashën dhe enturazhin e tij të deputetëve se nëse nuk kuptojnë qëndrimin politik të anëtarëve, atëherë është zgjedhja e tyre të ndeshen përballen me 44 mijë njerëz.
Krasta: Basha është konsideruar nga kundërshtarët e tij si një politikan që fle gjumë dhe ata që e kanë lavdëruar kanë thënë se është një pro perëndimor që nuk bërtet, por me sa duket po manifeston një sjellje të çuditshme kokëfortësie që nuk e kanë parë edhe ata që e kanë vë re me shumë kujdes gjatë këtyre 9 viteve. Ju vetë keni një shpjegim për këtë militarizim të gjuhës, me një reagim dhe pozicion inaçor, keni ju një përgjigje?
Nishani: Është dukshëm një arrogancë dhe fyerje ndaj shumicës dërrmuese të anëtarëve të PD-së, të cilët, ata janë PD. As Lulzim Basha smund të ishte kryetar i PD nëse nuk ishin ata aty anëtarët dhe ekzistencën e një partie politike e përbën anëtarësia e saj jo ata që zgjidhen në krye, pra nga ekzistenca e kësaj shumice. Kjo kurajo anti-civile, anti-qytetare i vjen nga mbështetja dhe komandimi i Ramës, pushteti i Ramës me të gjitha mekanizmat e këtij pushteti. Kjo nuk ka asnjë rëndësi. Ajo që nuk pres më tej nga Basha është të mos dhunojë më vullnetin qytetar dhe politik dhe identitetit të 44 mijë shqiptarëve, 44 mijë anëtarëve të PD, të mos vijojë më me provokimin e tij ndaj vullnetit të tyre. Kaq pres unë nga Lulzim Basha.
Krasta: Zoti Basha për momentin ka letra të hapura për dorëheqje, ndaj tij ka një presion nga disa qarqe që ai të qëndrojë aty deri në fund, për të realizuar të drejtën e vetë ekskluzive të drejtimit të partisë, pra nuk është çështje dëshirash as çështje kërkesash. Nga ne që e ndjekim nga larg, del një ngërç që po sikur ai të mos të ndyshojë, çfarë do të bëni?
Nishani: Atëherë ai dhe enturazhi që zgjedh të qëndrojë me të do ti vendosen përballë 44 mijë njerëzve dhe natyrisht 44 mijë njerëzit do të vazhdojnë të implementojnë vendimet dhe vullnetin e tyre politik. Janë në të drejtën e tyre, janë në lirinë e tyre fondamentale. 44 mijë anëtarë të PD kanë themeluar një klub politik, përfaqësojnë atë klub politik dhe kanë marrë një vendim. Kanë të gjithë të drejtën juridike, politike dhe të zotit, të çojnë deri në fund misionin e tyre. Zoti Basha dhe enturazhi që do qëndrojnë me zotin Basha, do të guxojnë të ndeshen me 44 mijë njerëz, atëherë është zgjedhja e tyre, le ta provojnë.
