Një ditë pas protestës së organizuar në Tiranë kundër “Open Ballkan”, grupi i rithemelimit të PD-së, pritet të shkojë në selinë blu për të zhvilluar mbledhjen e radhës, më vonë gjatë ditës.
Nuk dihet nëse ish-kryeministri Sali Berisha do të jetë pjesë apo do të shkojnë vetëm anëtarët e tjerë të komisionit.
Kjo është hera e tretë që grupi i rithemelimit të PD-së shkon në selinë blu. Dy ditë pas Kuvendit Kombëtar të 11 Dhjetori, Sali Berisha shkoi në seli ku zhvilloi mbledhjen e parë me 28 anëtarët e komisionit. Incidentet nuk munguan mes grupit të Berishës dhe Bashës.
Hera e dytë që Sali Berisha shkoi në seli, por këtë herë nuk u fut brenda duke qëndruar te shkallët ishte në 18 Dhjetor ku njoftoi rezultatet e referendumit të zhvilluar për shkarkimin e Lulzim Bashës.
