Ish-deputeti demokrat Gent Strazimiri, pasi voti sot në referendumin për shkarkimin e kryetarit Lulzim Basha, deklaroi shprehimisht se “cilido që është nëpër zyra, është thjesht një qiraxhi. Prokura hiqet me votën e demokratëve dhe nëse nuk e njeh, është “për të zezën” e tij”.
“Kuvendi është një dhe ka qenë ai i datës 11 Dhjetor, – theksoi Strazimiri. – Kush ha inat dhe mendon se mund të shkarkojë të gjithë Kuvendin, nuk është kjo rruga e duhur. Deri tani asnjë incident, asnjë problem, qendrat janë hapur në të gjithë vendin, ka fluks jashtëzakonisht të madh në qendrat e votimit. Selitë e zyrave janë ambiente të vogla, ne jemi përpjekur gjithmonë që të gjejmë ambiente të mëdha e zakonisht kemi votuar në hollet e Pallateve të Kulturës.
Nuk ka asnjë kështjellë për t’u marrë, pasi nuk ka asnjë kështjellë që nuk e kanë tashmë demokratët. Cilido që është nëpër zyra, është thjesht një qiraxhi, prokura hiqet me votën e demokratëve, nëse nuk e njeh është për të zezën e tij” nënvizoi Strazimiri.
