Lulzim Basha, i shkarkuar si Kryetar i PD nga Kuvendi Kombëtar i 11 dhjetorit, ka mbledhur në Pallatin e Kongreseve në Tiranë, mbështetës të tij, në atë që e quan si Kuvendi legjitim i demokratëve.
Por ajo që denoncohet në media të ndryshme është fakti se të pranishëm në Kuvendin e thirrur nga Basha janë edhe aktivistë apo zyrtarë të PS. Kështu u raportua se si delegat i Kuvendit të Bashës është regjistruar sekretari i degës së PS në Pukë, Gjergj Lala.
Gjithashtu, në mbështetje të Bashës është rrjeshtuar edhe Skënder Adem Hasa, ish-kryetar i Bashkisë PS në Peqin, i cili gjithashtu shfaqet si delegat.
Nuk dihet se sa të sakta mund të jenë raportime të tilla, pra nëse emrat e mësipërm që janë shfaqur në Pallatin e Kongreseve kanë ose jo mandat delegati në Kuvendin e thirrur nga Basha, por në anën tjetër demokratët, anëtarët e PD, po votojnë në një referendum të thirrur nga Kuvendi i 11 dhjetorit, për shkarkimin e Lulzim Bashës, përmes parimit një anëtar, një votë.
