Tekniku i Chelsea, Tomas Tuchel, i ka kërkuar presidentit Roman Abramoviç një tjetër blerje të çmendur në janar, ku kësaj radhe objektivi është mbrojtësi i majtë i Milanit, Teo Hernandez.
“El Nacional” në Spanjë ka zbuluar këtë të shtunë interesin dhe objektivin kryesor të kampionëve të Europës në këtë merkato janari. Sipas burimeve, Tomas Tuhel ka nevojë për një lojtar që të mbulojë zonën e majtë të mbrojtjes, pasi ka pasur probleme të shumta që nga dëmtimi i Ben Çilluell në ndeshjen kundër Juventusit. Anglezi pritet të mungojë deri në fund të sezonit dhe tekniku gjerman nuk do të rrezikojë më shumë për një periudhë kaq të gjatë duke futur si titullar spanjollin Markos Alonso. Që pas sfidës me Juventusin, Chelsea nuk ka mundur ta mbajë portën e paprekur dhe pas barazimit të fundit me Evertonin në shtëpi, Tuchel mendon se nuk mund të vazhdojë të rrezikojë pa Çilluell.
Teo Hernandez shihet si zëvendësuesi i duhur i 24-vjeçarit të Chelsea-t. Francezi është afruar në radhët e Milanit në vitin 2019 ku u huazua me të drejtën e blerjes nga Reali i Madridit. Gjatë këtyre 3 sezoneve, Hernandez ka qenë një pikë kyçe për ekipin e Stefano Piolit, ku në 100 takime ka arritur të shënojë 15 gola dhe të japë 14 asiste. Gjatë muajve të fundit, 24-vjeçari francez, është thirrur dhe nga Didier Deshamp, ku arriti të zërë menjëherë një vend në formacion dhe ku arriti të fitojë trofeun e Ligës së Kombeve.
Duke parë eliminimin e Milanit nga Liga e Kampionëve, ku përfunduan në vendin e fundit, Abramoviç është gati t’i bëjë kuqezinjve një ofertë të parezistueshme, nga e cila edhe vetë lojtari do të përfitonte.
