Lulzim Basha është duke zhvilluar në seli mbledhjen e Kryesisë, ku mësohet se po diskutohet rreth punimeve të Kuvendit të sotëm dhe rezultateve të dala prej tij. Një nga pikat që po diskutohet është edhe mbajtja e mbledhjes së Këshillit Kombëtar.
Fillimisht në PD u diskutua se mbledhja do të mbahej ditën e nesërme, por me kërkesë të disa anëtarëve ajo u shty, ndoshta për t’u mbajtur ditën e hënë. Në mbledhjen e Këshillit Kombëtar do të bëhet zëvendësimi i anëtarëve të përjashtuar nga Basha, të cilët ai i quajti njerëz që punojnë kundër vlerave të partisë dhe antiamerikanë.
Por, ndërsa Basha vijon mbledhjen në seli, edhe Sali Berisha ka njoftuar të mbajë një mbledhje pak minuta më vonë, po në seli. Në mbledhjen e Berishës pritet të bëhet publik numri i anëtarëve të partisë që morën pjesë në referendumin e sotëm. Pra në Partinë Demokratike kemi dualizëm.
Nga njëra anë Lulzim Basha dhe nga ana tjetër Sali Berisha.
Lulzim Basha gjatë punimeve të Kuvendit të sotëm e konsideroi nul referendumin e Berishës, madje edhe Kuvendin e mbajtur prej tij një javë më parë në Air Albania.
Ndërkohë edhe Berisha dhembështetësit e tij në të gjitha degët e konsideruan nul Kuvendin e Bashës.
Kujtojmë se përplasja mes Bashës dhe Berishës ka përfunduar në gjykatë dhe pritet që ditët në vijim të kemi një vendim.
