Deputetja e PD, Grida Duma, nga Pallatin e Kongreseve, atje ku janë mbledhur mbështetës të Lulzim Bashës, në atë që ai e konsideron si Kuvendin legjitim të demokratëve, tha se PD po angazhohet për vazhduar fokusimin e saj politik pro perëndimor dhe pro amerikan.
Sipas saj askush nuk mund t’i fshihet të vërtetës dhe pavarësisht se balancat u prishën PD do të vijojë në këtë rrugë.
Pas përjashtimit nga grupi parlamentar më 9 shtator, në mbledhjen e djeshme, të Kryesisë së shkarkuar të PD-së, Enkelejd Alibeaj propozoi që në strukturat qendrore të PD-së të mos ketë asnjë individ që është shpallur “non grata”. .
Lidhur me këtë Grida Duma ka theksuar se do të jetë Kuvendi që do të votojë për Berishën dhe do të vendosë për të. E pyetur për një përjashtim të mundshëm të Sali Berishës, Duma ka thënë se “pritet të votohet. Kjo ka ndodhur me pezullimin e tij”.
“Fakti që Berisha nuk e pranon këtë është çështje personale e tij. Është e rëndë për të se ka 30 vite, ai njëri që qeverisë opozitën apo pushtetin. Nuk ka vendim më të mirë se vota e Kuvendit. Ndodhi me vetëpërjashtimin e tij kjo situata për Sali Berishën”, tha Duma.
