Policia e Durrësit ka vënë në pranga 32- vjeçarin e shpallur në kërkim lidhur me plagosjen me armë zjarri të 20-vjeçarit Arni Sulejmani në një hotel në autostradën Durrës-Tiranë.
“Specialistët për Hetimin e Krimit në DVP Durrës kanë bërë kapjen dhe ndalimin e shtetasit në kërkim T. Sh., 32 vjeç, banues në Durrës, të cilin Gjykata e Shkallës së Parë Durrës, më datë 10.12.2021, i ka caktuar masën e sigurisë “Arrest në burg”, për veprën penale “Moskallëzim krimi”, në lidhje me ngjarjen e ndodhur më datë 09.12.2021, në ambientet e dhomës së një hoteli në autostradën Durrës-Tiranë, ku mbeti i plagosur me armë zjarri një 20-vjeçar”.
Materialet kaluan në Prokurorinë e Rrethit Gjyqësor Durrës, për veprime të mëtejshme.
Ndërkohë vijon të mbetet në kërkim 26-vjeçari Markeljan Beqiri, i cili dyshohet si autor i plagosjes së të riut.
Tentativa e vrasjes u shënua me 9 dhjetor në një hotel në autostradën Durrës-Tiranë, ku qëndronin tre djem dhe një vajzë.
Motivet e konfliktit mbeten të paqarta, por burimet thonë se ata kishin përdorur drogë dhe alkool.
