Nga Boldnews.al
Zëvëndëskryeministri Arben Ahmetaj, pa iu “drishur qerpiku” komentoi për arrestimin e Leftër Kokës në aferën e inceneratorëve. “Përballja me drejtësinë është individuale, nuk është as kolektive, as politike”-tha Ahmetaj në majën e shkallëve të kryeministrisë. Ai duket i qetë, hetimi që nisi me shumë bujë përfundoi në arrestimin e ish-ministrit të qeverisë “Rama 1” Lefter Koka dhe shpalljes në kërkim të dy biznesmenëve.
Afera është shumë më e madhe se “Koka” që u bë “Kokë Turku”, vetë Ahmetaj është personazhi i akuzuar nga opozita, por edhe mbi bazën e fakteve që ka miqësi me të dy biznemsnët kotrovers që nga hiçi dolën si larësit e një skandali të frikshme që ka të bëjë me menaxhimin e mbetjeve. Ishim mësuar të dinim se mafia zakonisht kap “biznesin e mbetjeve”, por tek ne qeveria e mori vetë rolin…
Nga ana tjetër, SPAK-ut i duhet një dosje për ta tundur si suksesin e madh të reformës në drejtësi. Ka dy vjet që funksionon e ngritur për të luftuar korrupsionin në nivele të larta shtetërore, por nuk kishte asnjë bilanc të vetëm. U menduan dhe dikush duhej lëshuar në duart e drejtësisë së re, e cila edhe ajo ka nëvojë për një fabul. U gjet ish-ministri i LSI-së dhe së fundmi i zgjedhur deputet i PS-së Leftër Koka, post deputeti që nuk e gëzoi asnjë ditë, pasi dha dorëheqjen në mënyrë të papritur.
Pikërisht më 1 shtator të këtij viti ishte momenti kur Koka e kuptoi qartë se kishte ardhur koha që për “interes të partisë” do të bënte edhe burg. “Sot është dita që rrugëtimin tim politik ta vijojnë ata mijëra bashkëpunëtorë të mitë, që më bënë fitues për vite me radhë dhe që mbase nuk kam mundur asnjëherë t’i falënderoj sa duhet. Sot, e ardhmja u përket atyre! Me këtë vendim timin, është njohur institucionalisht si Komisioni Qendror i Zgjedhjeve ashtu edhe Kuvendi i Shqipërisë”, shkruante Koka për motivet e dorëheqjes.
Në fakt e djeshmja, e sotmja dhe e ardhmja ishin kryeministri Edi Rama dhe tarafi i tij i afërt, Arben Ahmetaj, Damian Gjiknuri dhe Erion Velij. E kishin bërë baltë me aferën dukshëm korruptive të inceneratorëve dhe pasi e përdori për të përçarë LSI-në në Durrës dhe marrë tetë mandate, Rama e hodhi në “kthetrat” e etura të SPAK, e cila nga ana e saj po bën goditje mëse selektive, atë që u lë ai i madhi.
Askush të mos mendojë se Koka do nisë të rrëfehet para SPAK, pasi edhe nëse e bën diçka të tillë nuk do i merret për bazë. Personat pranë zëvendëskryeministrit Ahmetaj shprehen se kohët e fundit ka shfaqur një lloj shqetësimi, por që nga dita e djeshme është shumë më i qetë. Bashkë me Kokën që i ra “ruleta Ruse” kryeministrore për tu saktrifikuar përkohësisht u mbyll një akt i rëndë korruptiv, i cili vijon e do të vijojë. Incenetartori i Fierit dhe i Tiranës janë dy impiantet që po përpinë paranë publike.
Sërish këtu jemi, dikush doli bedel për të bërë “burgun e të tjerëve”, ama një “bedel i pasur” që gjithsesi është aq i zgjuar sa të kyçë gojën dhe të mendojë kleçkat ligjore që do i përdorë për të dalë sa më shpejt në liri të plotë.
