Tedi Cara vazhdon të jetë shpëtimtari i Partizanit në këtë sezon. Nëse ndaj Dinamos nuk shënoi, ishte ai që dha asistin për Esat Malën duke dhënë ndihmë të drejtpërdrejtë për fitoren.
Pas ndeshjes ai foli për “Panorama Sport”, ku tregoi për pikën e tij të dobët, largimin e mundshëm në një ligë më të fortë dhe më të pasur dhe “tersin” ndaj Dinamos.
NDESHJA – Kur bëhet fjalë për derbi, domosdo është ndeshje e vështirë. Luajtëm shumë mirë ndaj Dinamos dhe mendoj se në fund i merituam tri pikët. Krijuam shumë raste dhe mendoj se i merituam tri pikët.
RASTI I HUMBUR – Jam koshient për rastin e humbur. Cilësia ime me kokë nuk është idealja. Më parë kam humbur edhe shumë raste të tjera. Do të punoj në stërvitje për ta përmirësuar këtë sepse është pika ime e dobët.
NDESHJET E ARDHSHME – Jam i lumtur që në fund fitoi ekipi, dhashë atë pasim ndaj Malës dhe ndihmova. Janë tri pikë morali, kemi edhe dy ndeshje shumë të forta, do të bëjmë maksimumin dhe shpresoj t’ia dalim të marrim gjithë pikët e mundshme.
ASNJË GOL NDAJ DINAMOS – Është e vërtetë, si duket Dinamo qenka ters për mua.
KALIMI JASHTË VENDIT – Ëndrra e çdo lojtari këtu është të arrijë të transferohet në një kampionat më të fortë jashtë vendit, por fillimisht duhet bërë mirë tek ekipet shqiptare. Unë duhet të bëj mirë te Partizani, të sakrifikoj, të jetë ekipi në vendet e para të renditjes, për të bërë më pas klubet e huaja të kthejnë sytë këtu.
