Takimi që nuk e prisnit. Zlatan Ibrahimovic u prit në Vatikan nga Papa Francesco. “Paqe dhe dashuri”, – ka shkruar sulmuesi i Milanit në rrjetet sociale, përkrah fotos.
Entuziasëm i madh nga ana e tifozëve kuqezinj, të cilët me ironi kanë komentuar disa herë si më poshtë: “Nga njëra anë Papa, nga ana tjetër Zoti”.
Kush e di nëse një takim kaq i rëndësishëm nuk do ta ngarkojë suedezin edhe më shumë në funksion të ndeshjes së radhës që pret skuadrën e Piolit.
Mbrëmjen e së dielës, në “San Siro”, do të luhet sfida ndaj Napolit të Spallettit. Dhe Zlatan me siguri do të jetë një nga protagonistët më të shumëpritur.
“Bekimin” e ka marrë në Vatikan, gjatë këtij takimi me Atin e Shenjtë… Zlatan nuk ka shkuar duarbosh në Vatikan. Ai i ka dhuruar Papës një fanellë kuqezi, bashkë me librin e ri të tij “Adrenalina”.
Kreu i katolikëve e vlerësoi gjestin e suedezit: “Do ta lexoj librin tuaj me dëshirë, sporti është një mesazh njerëzimi dhe madhështie”.
