Pesë ambasadorë të akredituar në Tiranë po zhvillojnë një takim në selinë e PD-së me Lulzim Bashën, i cili u shkarkua nga posti i Kryetarit të kësaj partie nga Kuvendi Kombëtar i 11 dhjetorit.
Nga foto e shpërndara nga zyra e shtypit e Lulzim Bashës, shihet se në krah të tij në takimin me diplomatët janë Gazment Bardhi, Jorida Tabaku, Grida Duma, Enkelejd Alibeaj dhe Alfred Rushaj.
Ndërkohë, në takimin me Bashën, përveç ambasadores Yuri Kim, ndodhen edhe ai i BE-së, i Britanisë së Madhe, Gjermanisë dhe Francës.
Tema e diskutimit janë zhvillimet e fundit në rradhët e opozitës, ku pas Kuvendit të 11 dhjetorit, është shkarkuar nga funksionet drejtuese e gjithë kupola e PD, ndërsa është ngritur një Komision Rithemelimi i përbërë nga 29 anëtarë, i cili dje zhvilloi mbledhjen e parë në selinë e demokratëve.
Me përjashtim të diplomates Yuri Kim, e cila është shfaqur si mbështetëse e Lulzim Bashës, diplomatët e tjerë të pranishëm në takim, kanë mbajtur një qëndrim neutral lidhur me përplasjet e krijuara në Partinë Demokratike. Madje kohë më parë, ambasadori Soreca teksa u pyet nëse do të bashkëpunonte me një PD të drejtuar nga Sali Berisha, nuk e përjashtoi si mundësi.
Nga foto e mëposhtme, në dallim nga takime të mëparshme, duket qartazi një qëndrim krejt serioz i diplomatëve, që duket se kanë hyrë në lojën e negociatave, për të zgjidhur sa më parë situatën e krijuar në partinë më të madhe të opozitës.
