Zv.ministër i Brendshëm, Besfort Lamallari, i konsideron ekzekutimet me armë zjarri si një fenomen rajonal, madje edhe global.
Me pak fjalë, meqë ekzekutimet që kryhen në Shqipëri me armë zjarri janë fenomen global, atëherë s’ka ndonjë gjë shqetësuese, edhe pse në vend po ndodhin ca si shpesh vrasje, ndërsa autorët përgjithësisht ikin në drejtim të paditur.
Që vrasje ndodhin në vende të ndryshme të Botës kjo dihet, problemi që ka Shqipëria është fakti se këtu ata që mbajnë armë kanë filluar mos kenë frikë nga ligji dhe arma në brez apo çantë, është kthyer si diçka normale, pak a shumë si një paketë apo çakmak.
Në studion e Faxnews, Lamallari thotë se do kishte masa të caktuara të cilat synonin shtimin e kontrolleve në dogana dhe në subjete të cilat merren me trajnimin e personave të cilëve detyra ua dikton mbajtjen e një arme zjarri si element sigurie.
“Ky fenomen nuk është vetëm kombëtar, por edhe rajonal dhe botërore. Ajo cfarë ne duam të realizojmë është që të përmirësojmë kuadrin ligjor dhe ta përshtasim me atë europian.
Ne kemi organizim më të mirë me partnerët si brenda ashtu edhe jashtë vendit. Konkretisht kemi disa institucione të cilat bashkëpunojnë për të ndaluar këtë fenomen. Sot ne dakordësuam në nivel rajonal për të zbatuar një ndërgjegjësim në shoqëri sa i përket përdorimit të armëve të zjarrit. Fushata që po organizojmë është “festo me zemër dhe jo me armë” që lidhet me festat e fundvitit.
Një element tjetër, është fakti që disiplinohet veprimtaria e subjeteve tregtare të cilat përfshihen në trajnimeve për armët e zjarrit, poligonët etj.
Synohet aksesi në databazën e doganave sa i përket kontrollit efikas për armët e zjarrit. Një element tjetër janë edhe përmirësimet që do bëhen në kodin penal”, tha ai.
