Një apartament që përdorej nga Edmir Vlashi, raportohet se është zbuluar nga uniformat blu. Policia konfirmoi këtë të Hënë se efektivët gjetën dhe sekuestruan në këtë banesë, armë zjarri pistoletë, si edhe leje drejtimi e dokumente të tjera të lëshuara nga një shtet tjetër.
Edmir Vlashi dhe Hektor Ndoka janë shpallur në kërkim pasi akuzohen se kishin përgatitur ekzekutimin e Preng Palucës.
Ndaj tyre, gjykata e Lezhës caktoi masën e sigurisë arrest me burg në mungesë.
Javën e kaluar, policia sekuestroi arsenal me armë, municion, mina me telekomandë, një sasi e konsiderueshme eurosh, e dyshuar si e përfituar nga veprimtaria kriminale dhe sende të tjera të kundërligjshme.
Tre persona u arrestuan, një prej të cilëve u lirua më pas nga gjykata.
