Deputeti Oerd Bylykbashi ka prezantuar në Kuvendin Kombëtar të PD ndryshimet statutore, që priten të votohen nga delegatët e pranishëm në Air Albania.
Bylykbashi tha se sot japim provën se demokracia nuk është burokraci.
“Ndryshimet në statut në vitin 2018 dhe 2021, të bëra nga Kryetari në detyrë, zhbënë rolin e organeve të PD dhe vranë garën në Partinë Demokratike.
Sot synojmë të projektojmë një PD që të rikthejmë garën në Partinë Demokratike, duke mbrojtur vlerat konservatore dhe euro-atlantike, që Lulzim Basha i asfiksoi.
Parimi një anëtar një votë, do të shtrihet në zgjedhjen e kryetarëve të degëve, përmes këtij parimi. Kandidatët për deputetë dhe kryebashkiakë, do të bëhen me votime primare, vota e anëtarëve do të vlejë më shumë se ajo e Kryetarit.
Do të vendosim referendumet, duke i dhënë mundësi anëtarëve që të zgjedhin dhe të vendosin me votën e tyre.
Do të vendosim në statut fraksionet, duke lejuar për të funksionuar për herë të parë në PD, fraksionet, dhe duke hequr dorë nga praktikat e përjashtimit të atyre që mendojnë ndryshe.
Nuk do të ketë më kuptime, e gjitha do të bazohet në zgjedhjen e anëtarëve të Forumeve me votë të fshehtë dhe me garë.
Të zgjedhurit në organet kolegjiale do të jenë shumicë, do ti japim fund që të emëruarit të jenë shumicë.
Kryetari humbës largohet menjëherë nga detyra, pa ekuivok”, tha Bylykbashi.
Sipas tij, logo e PD do të jetë ajo e 31 viteve më parë, ndërsa vula e Kryetarit në detyrë, nesër nuk do të ketë asnjë vlerë, pasi do të ndryshohet nga ky Kuvend.
Ndryshimet
Parimi një anëtar- një votë: Kjo për zgjedhjen e anëtarëve në qendër, por edhe ato të degëve që nuk zgjidheshin më parë.
Votimet primare: Për të zhbërë praktikën negative të Lulzim Bashës, kur kandidaturat shpallen në minutën e fundit. Tashmë demokratët i zgjedhin me votën e tyre.
Referendumi: Vendime të rëndësishme do merren nga anëtarësia.
Fraksionet: Partia bëhet më e madhe, jo duke përjashtuar, por duke njohur grupimet ndryshe. Të mendosh ndryshe është vlerë, jo kërcënim për kryetarin.
Organet kolegjiale: Ato që u dobësuan nën kërkesat e kryetarit për më shumë pushtet, do forcohen. Kryetari nuk i përdor më ato si vulë noteri. Forcohen edhe organet kolegjiale edhe në bazë.
Kryetari humbës: Kryetari që humb zgjedhjet, i mbaron mandati menjëherë dhe pa ekuivok. Ky mekanizëm incentivon lidershipin e suksesshëm pa nxitur kultin e liderit.
Organizatat partnere: Përveç FRPD dhe LDG, shtohet edhe Grupi i Dhjetorit. Do kenë akses më të madh në listat e kandidimit. Forcohet dhe garantohet pavarësia e tyre stature.
Simbolet e PD: Basha zhduku logon dhe simbolet e partisë në vitin 2017. Sot burokratët e PD i shohin simbolet si marka tregtare. Ato do jenë shumë të rëndësishme për PD-në. Ndryshon logo, ndryshon vula e kryetarit. Vula e kryetarit sot nuk do ketë më vlerë nesër.
Zgjedhjet në PD: Partia do futet në një fazë reformimi me anë të zgjedhjeve. Zgjedhjet me ‘një anëtar- një votë’ do përcaktojnë organet e reja. Propozojmë që tranzicioni drejt organeve të ngritura me votën tuaj, të ngrihet një organ kolegjial dhe i përkohshëm me figura të njohura në PD, do të garantojë funksionimin e partisë.
