Gjykata e Apelit Tiranë ka ashpërsuar dënimin për Noel Dishin, i shpallur fajtor për vrasjen e Vilson Tafçiut, janarin e vitit 2020 në Tiranë.
Në Shkallën e Parë Dishi ishte fajësuar për “vrasje me dashje” dhe ishte dënuar me 10 vjet e 8 muaj burg. Në përfundim të gjykimit në Apel, një Kolegj Penal la të pandryshuar deklarimin e fajshëm, po rriti dënimin e tij në 13 vjet e 4 muaj burg.
Ngjarja për të cilën u dënua Dishi ndodhi në 20 janar 2020 pranë një lokali në zonën e Astirit në kryeqytet. Sipas gjykatës, motiv i konfliktit ishte një vajzë. Në deklarimet e saj në gjykim, e reja ka pohuar se i kishte njohur dy personat në rrethana të pavarura dhe se i akuzuari Noel Dishi kishte këmbëngulur për një lidhje me të. Ajo ka vënë re një acarim të të akuzuarit, kur ai kishte mësuar se ajo kishte njohje edhe me Vilson Tafçiun.
Ndërsa dëshmitarë të tjerë kanë rrëfyer për një hatërmbetje të 29-vjeçarit Dishi, që pretendonte se Tafçiu e kishte sharë te një vajzë. Gjykata e Shkallës së Parë arsyetonte në vendim se vrasja e 28-vjeçarit Tafçiu ka ndodhur në gjaknxehtësi, pas një grindjeje të çastit, shoqëria e pretenduar nga secili prej tyre për të njëjtën vajzë.
