“Lidershipi nuk është pronë e askujt në demokraci”, u shpreh shkrimtari Preç Zogaj, një prej themeluesve të Partisë Demokratike, i cili ishte i pranishëm në një aktivitet të organizuar nga kreu demokrat Lulzim Basha në ditën e 8 dhjetorit.
Zogaj tha se historinë e PD e shoqëroi një kulturë moniste, ndërsa tha se demokracia nuk është pronë e askujt. Sipas tij, Shqipërisë i mungoi qarkullimi i elitave, ndaj dhe studentët e dhjetorit, në shumicën e tyre u larguan, ikën jashtë vendit sepse nuk u pajtuan me kulturën moniste.
“Ne s´duhet të pranojmë kurrësesi se rinia të përdoret si dekor, rinia ka tjetër mision, ajo sjell perspektivën, sjell freskinë, ndaj edhe rinia duhet të luajë rolin e saj”, tha Zogaj.
Ai tha se PD duhet të zgjidhë problemin e dualizmit, nuk mund të fitojë nëse kryetari nuk bëhet kurrë kryetar dhe ish-kryetari nuk ikën kurrë si kryetar.
Zogaj foli për rivendosjen e marrëdhënieve të ngushta me SHBA, duke shtuar se nëse nuk jemi në rregull me dy premisat: zgjidhjen e dualizmit dhe marrëdhëniet me SHBA, nuk mund të garantohet fitorja në zgjedhje.
