Edicioni i 60-të i Festivalit të Këngës në Radio Televizionin Shqiptar do të mbahet këtë vit në datat 27, 28, 29 dhjetor në Pallatin e Kongreseve teksa këtë të hënë u prezantua zyrtarisht edhe “ekipi” i prezantuesve.
Ardit Gjebrea rikthehet në këtë festival, pas shumë vitesh, në këtë edicion jubilar të 60-të të Festivalit të Këngës në rolin e prezantuesit. Krah tij në prezantim do të jenë emra të njohur të ekranit, këngëtarja Jonida Maliqi dhe moderatorët Xhemi Shehu, Isli Islami dhe Kelvi Kadilli.
“Prisni dashuri dhe muzikë të vertetë!”, ishin fjalët e Ardit Gjebrea në konferencën për shtyp të #Fest60, më 6 dhjetor.
Kozeta Kurti dhe Zefina Hasani do të jenë pjesë të fjalës së Festivalit duke qenë bashkë skenariste, të cilat në konferencën e sotme treguan pak nga surprizat e tri netëve live.
Nata e parë i dedikohet konkurrimit të 20-të këngëtarëve, nata e dytë nostalgjisë, duke qenë prezent çdo emër që ka lënë gjurmë, në 60 vjet histori dhe nata e tretë, më 29 dhjetor, do t’i dedikohet formatit të Eurovisionit.
Në Festivalin e 60-të, do të konkurojnë midis tyre këngët e interpretuara nga:
Alban Ramosaj
Denis Skura
Evi Reçi
Gjergj Kaçinari
Janex (Xhejn Kumrija)
Kastro Zizo
Kelly
Mirud
Rezarta Smaja
Ronela Hajati
Saimir Çili
Stefi dhe Endri Prifti
Shega
Urban Band
Eldis Arrnejti
Ester Zahiri
Kejsi Rrustja
Olimpia Smajlaj
Viola Xhemali
Xhuljana Pjetra.
