Vaksinimi i detyruar ndaj koronavirusit duhet të jetë opsioni i fundit në absolut. Pohimi vjen nga zyrtarët e lartë të Organizatës Botërore të Shëndetësisë.
Kreu i zyrës për Europën, Hans Kluge, thotë se fillimisht duhet të ezaurohen të gjitha mundësitë e tjera për të rritur nivelin e imunizimit në komunitet. Metodat liberale të nxitjes së vaksinimit anti-covid kanë rezultuar shumë efikase në disa mjedise, ndërsa urdhrat detyrues kanë ndikuar negativisht.
“Efekti që mund të ketë vaksinimi i detyruar në besimin publik, gjithashtu në marrjen e vaksinës, duhet të merret parasysh: çfarë është e pranueshme në një shoqëri dhe komunitet mund të mos jetë efikase dhe e pranueshme në një tjetër”, deklaroi Kluge.
Pavarësisht thirrjes së qartë, më shumë shtete në Europë, përfshirë Gjermaninë, po debatojnë për vaksinimin e detyrueshëm për Covid-19, pasi Austria njoftoi se do të nisë me zbatimin e kësaj qasje nga 1 shkurti i vitit të ardhshëm.
Vendimi u prit me protesta të mëdha. “Për çdo masë që mund të kufizojë të drejtën e lëvizjes të një personi, të tilla si izolimet apo ato detyruese, duhet të garantohet përkujdesja për shëndetin dhe mirëqenien mendore, të ekzistojë një mjet për parandalimin/zbulimin e hershëm dhe menaxhimin e dhunës në familje, dhe mbështetje mikro-ekonomike në dispozicion për më të prekurit”, vijoi ai.
Shqetësim të madh shprehu për shifrat ditore të raportuara në Europë. Kluge paralajmëroi një përkeqësim të situatës pandemike për shkak të festave të fundvitit. Gjithashtu, mbështeti aplikimin e një doze përforcuese të vaksinave anti-covid.
