Një grup i strukturuar kriminal, ku ishin të përfshirë me dhjetra policë grekë, por edhe kontigjente kriminale nga Shqipëria, raportohet se është shkatërruar në Greqi.
Mediat greke raportojnë se grupi i policëve, i përfshirë në aktivitet kriminal, merrte 30 mijë euro, për të “pastruar” kriminelët shqiptarë, të cilët më pas përmes dokumenteve false konsideroheshin si minoritarë nga ish-Bashkimi Sovjetik.
Mediat greke kanë raportuar detaje lidhur me hetimet, që kanë nisur pasi një person ishte i pajisur me një kartë identiteti, e cila më pas u konstatua se ishte falsifikuar.
Hetimi ka nisur rreth 1 vit më parë pas një kontrolli të rastësishëm në Chalandri.
Policia ndaloi një person të dyshimtë në zonë dhe i kërkoi dokumentin e identifikimit. I ndaluari nxori nga xhepi kartën e ID greke në të cilën quhej Alexios Tsvetkov dhe vendlindja e tij ishte Susumi në Abkhazi.
Por tiparet e fytyrës dhe e folura duket se kanë ngritur dyshimet te policët grekë, që kanë thelluar hetimin, duke i bërë një test, i cili konsistonte në përdorimin e disa frazave, që përdoren nga shumica e grekëve të kthyer nga ish-Bashkimi Sovjetik.
Mediat greke raportojnë se personi i ndaluar i ka shpërfillur këto fraza, duke mos dhënë përgjigje, çka duket se ka shtuar dyshimet mbi identitetin e tij.
Policia i ka bërë një foto personit dhe e ka futur në një motor kërkimi që përdoret nga policia greke, ku ka rezultuar se i ndaluari ishte një shqiptar i akuzuar për trafik kokaine, zhvatje, lëndë plasëse dhe sulm ndaj një oficeri policie. Kështu ai u arrestua dhe u mor në pyetje.
“Më datë 26.01.2021, në komisarit është sjellë një person, i cili ka paraqitur si dokument identiteti nr. Karta e identitetit ΑΟ152663 me detajet e listuara: Emri: Alexei i Alexios.
ID e cila është lëshuar më 7 shkurt 2020 nga departamenti i sigurisë. Megjithatë, nga këqyrja e gjurmëve të gishtave, u zbulua se ai ishte shtetas shqiptar, L. D, i lindur më 26 mars 1980, në Shqipëri. Më pas ai u arrestua për shkelje të nenit 242 për vërtetim të rremë, falsifikim etj.”, citohen dokumentet, në median greke.
Në vijim raportohet se “nga 2013 e tutje, u formua një organizatë kriminale, e përbërë kryesisht nga të kthyerve greke nga ish-Bashkimi Sovjetik, policisë dhe shërbyesit e tjerë civil, i cili kishte zhvilluar një rrjet të bashkëpunëtorëve dhe ishte aktiv në dhënien e kartën e identitetit dhe pasaportën për të huajit.
Me veprimet e tyre, anëtarët e qarkut përfitonin sasi të larta financiare, ndërkohë që shtetas të huaj të vendeve të treta, fituan nënshtetësinë greke, me të gjitha të drejtat që kjo përfshin, si liria e lëvizjes në vendet brenda dhe jashtë Shengenit, patentë drejtimi, numri i regjistrimit të sigurimeve shoqërore, lëshimi i numrit të regjistrimit tatimor, ndërsa në disa raste kanë themeluar ose marrë pjesë në shoqëri dhe në përgjithësi kanë mashtruar autoritetet dhe shërbimet publike.”
Dyshohet se dhjetë emra të mëdhenj të botës së krimit përfshihen në “klientelën” e qarkut të madh me letërnjoftime dhe pasaporta false që u shkatërruar në Greqi.
Gjatë hetimeve atyre iu gjetën para cash prej 600 mijë eurosh, nga të cilat 320 mijë euro u gjetën në kasafortën e një oficeri dhe komandanti të Departamentit të Sigurisë në Atikën perëndimore.
Gjithashtu bëhet me dije se 10 policë mund të jenë arrestuar por të akuzuarit me uniformë janë 34 ndërsa “tarifa” për çdo ID ishte 30 mijë euro.
Mes 20 të arrestuarve janë një nëpunës civil i Ministrisë së Mbrojtjes, një Oficer i Regjistrimit të OTA, një avokat dhe tetë shtetas të tjerë.
