Dy persona janë vënë në pranga lidhur me vrasjen e ish-deputetit dhe ish-kreut të Komunës Velipojë Pashko Ujka, krim i ndodhur në Shkodër tre ditë më parë.
Mësohet se në pranga është vënë Kristian Kelmendi, 20 vjeç, si autor i dyshuar i vrasjes. Personi i dytë i arrestuar është E.M., i cili dyshohet se ka ndihmuar Kristian Kelmendin të largohet nga zona e krimit.
Ujkës i është bërë pritë pranë shtëpisë së tij, në lagjen “Vasil Shanto” në Shkodër. Ai mori plagë në shtyllën kurrizore dhe për pasojë humbi jetën në spital.
Dyshohet se krimi ka ndodhur per nje borxh te pashlyer të ish-deputetit ndaj 20-vjeçarit Kelmendi, për blerjen e nje apartamenti.
Në momentin e vrasjes, Ujka ka qenë i shoqëruar nga bashkëshortja dhe vëllai i tij të cilët kanë parë të gjithë ngjarjen. Në dëshminë e saj, gruaja ka deklaruar se thjesht ka parë bashkëshortin e saj që është shembur në tokë, duke konfirmuar se është qëlluar me silenciator.
Pashko Ujka, gjatë legjislaturës 2005-2009, ishte deputet i PDK-së në parlament. Ujka ka shërbyer edhe si kryetar i komunës së Velipojës në vitet 2011- 2015, nën siglën e PS.
