Pak orë pasi Kryeministri Edi Rama foli mbi procesin e vaksinimit, duke paralajmëruar se do të vijë dita që nënpunësit publikë apo edhe privatët nuk do të lejohet të punojnë të pavaksinuar, Komiteti Teknik i Ekspertëve ka mbajtur mbledhjen periodike për të bërë informimin e popullsisë sa i përket gjendjes së pandemisë në vend.
Anëtarja e Komitetit, Silva Bino tha gjatë fjalës së saj se ishin rritur rastet pozitive tek grupmoshat e reja si pasojë e vazhdimit të mësimit edhe në klasa ku kishte shpërthyer infektimi me Covid-19.
Më tej ajo kërkoi një vaksinim më të lartë pasi në të gjithë vendin i vetmi qark me shifra më të larta ishte Tirana.
Ndërsa sa i përket infeksioneve, Bino shtoi se ishin 10 herë më të larta tek ata që ishin të pavaksinuar sesa tek ata që janë të vaksinuar.
“Situata epidemiologjike në javën e fundit paraqitet e qëndrueshme me dy javët e para, nuk kemi një rritje të rasteve oërkundrazi kemi një ulje të paktë të rasteve. Nga ana tjetër edhe pozitiviteti është i njëjtë pak a shumë në këto 3-4 javët e fundit. Shikojmë që kemi një rritje të infektimit të grupmoshave të reja deri në 14 vjeç. Kjo lidhet edhe me disa vatra nëpër shkolla, ku nuk është ndërprerë mësimit.
Sa i përket vaksinimit, mund të shkojë deri në 45% në nivel kombëtar por në Tiranë shifra e vaksinimit me të dyja dozat shkojnë mbi 50%.
Kërkojmë të kemi një ritëm më të lartë. Lidhur me analizën e infeksioneve që shfaqen edhe në personat e vaksinuar, vëmë re se janë 10 herë më të larta tek personat e pavaksinuar krahas atyre të vaksinuar.
Aktualisht kemi të dhëna kombëtare të cilat shkojnë pak a shumë si ato të vendeve të tjera. Nga ana tjetër ka filluar procesi i dozës përforcuese për personat e vaksinaur deri më tani”, tha Bino.
