Mes entuziazmit dhe thirrjeve “Berisha, Berisha”, ka nisur takimi i ish-Kryeministrit Sali Berisha, me demokratët e Tropojës, që për minuta të tëra kanë brohoritur “Rama ik”.
Ish-Kryeministri Berisha u shpreh se ndjehej i bekuar qe kishte lindur në Malësinë e Gjakovës, ndërsa shtoi se pas dekadash në Tiranë dhe qindra shëtitjesh nëpër Botë, dua t´ju them se në vendlindjen time kreva universitetin më të rëndësishëm të jetës sime, mora diplomën e jetës sime.
“Unë dhe bashkëmoshatarët e mij jemi mëkuar në odat e burrave me dashuri të pakufijshme për vendin, për Kosovën. Shkolla dhe librat e kishin ndaluar Kosovën, nuk ekzistonte në libra, pasi diktatori Enver Hoxha e kishte shitur”, tha Berisha, duke shtuar se në “odën e burrave kishte marrë eleksirin e jetës, dashuria për kombin, dashuria për Kosovën”.
Ai shtoi se kombi shqiptar lindi nga kanuni dhe nga uni, jo nga librat, shkollat dhe universitetet.
Berisha tha se në 8 vitet e fundit, veriu i Shqipërisë është persekutuar më shumë se çdo periudhë tjetër, përfshi edhe ato pushtetuese.
“Edi Rama është armik i egër i qenies së shqiptare. Rama ia vuri vizën juve, i vuri taksë veriut, i vuri taksë Kosovës. Në 8 vite, Edi Rama, ndonëse me ministrat e tij, shumëfishuan pasuritë e veta, varfëruan qytetarët shqiptarë. Sot shqiptarët kanë rrogat më të ulëta në Rajon, 20-30 % më të ulëta se në Kosovë”, tha Berisha.
