Megjithëse Kryeministri Edi Rama e nisi me pompozitet dhe si një show procesin e vaksinimit kundër Covid-19, madje duke përfshirë edhe përdorimin e vaksinës kineze, e cila ende nuk ka marrë një certifikim nga EMA, Shqipëria mbetet vendi i fundit në rajon përsa i takon përqindjes së popullatës që ka marrë të dy dozat e vaksinave.
Në Shqipëri me dy doza vaksinash janë vaksinuar 33 % e popullatës, përfshi këtu edhe ata me vaksinat kineze. Shifra është pranuar se është e ulët edhe nga vetë zyrtarë të shëndetit publik, ndërsa dështimi në këtë proces duket se lidhet me mosbesueshmërinë por edhe me propagandën që shoqëroi vaksinimin që nga dita e parë.
Ndërkohë në Kosovë, e cila e nisi procesin shumë muaj mv vonë se Shqipëria dhe ku janë aplikuar vetëm vaksinat e certifikuara nga EMA, me dy doza janë vaksinuar 43% e popullsisë, në Maqedoninë e Veriut 38%, në Malin e Zi 41%, ndërsa në Greqi 63%.
Sa i përket gjendjes epidemiologjike, virusi rezulton i përhapur në Maqedoni të Veriut, me 8 398 persona pozitivë me COVID-19, ndërsa në Shqipëri ka 7 422 persona, dhe në Kosovë më pak, 335 persona pozitivë me COVID.
Prej fillimit të vaksinimit në Shqipëri janë kryer në total 2,096,897 doza të vaksinës ndaj COVID-19, nga të cilat 1.071.871 doza të para; 959.555 doza të dyta; 65.471 doza të treta, thotë Ministria e Shëndetësisë.
Shqipëria nisi nga 1 nëntori injektimi me dozën e tretë për moshat mbi 60 vjeç si dhe për mjekët e infermierët. Po ashtu, edhe vaksinimin për herë të parë tek grupmoshat mbi 16 vjeç.
