Në zonën e Drenasit, në 17 prill të vitit 1999 Fadil Muçolli, një ushtar i UÇK-së së bashku me vëllain e tij morën vesh që forcat serbe po mësynin drejt fshatit. I kërkuan familjes që të largoheshin në drejtim të Drenasit.
Menduan që familja ishin larguar, por në fakt nuk kishin mundur. Fadil Muçolli, sot kujton dramën e madhe të tij, 4 fëmijë së bashku me bashkëshorten ia vranë.
I ulur në shkallët e shtëpisë, ai tregon se si pati kurajo të jetonte më pas, historia e tij është tronditëse.
Fadil Muçolli: Masakra u bë në shtëpinë time, në atë masakër dhe sot është dhoma ku është kryer sulmi, është gjaku aty.
Nuk na kanë ftuar në Hagë për të dëshmuar për krimin. Nuk ka as drejtësi europiane.
Por çfarë faji ka pasur foshnja?
Atë natë e kam kuptuar prej dëshmitarëve që kanë shpëtuar. Ka hyrë vëllai me dy ushtarët, dhe ka parë kufomat që i kanë djegur. I kanë vrarë dhe më pas i kanë djegur. Ka pasur kufoma.
Të nesërmen e kemi planfikuar për t’i nxjerrë, ata kanë hyrë edhe i kanë djegur. Në atë shtëpi kocka më e madhe ka qenë sa kjo cigare.
Ne, të UÇK-së kemi hyrë edhe kemi mbyllur dritaren me batanije dhe kemi mbledhur kockat e mbetura, kemi shkuar në mal, në një bunkier dhe pas luftës i kemi varrosur, në një varr 51 eshtra.
Këto janë fletoret e fëmijët, i kam gjetur dhe fshehur në një fletore të vjetër, i kishin hedhur në oborr dhe sot i ruaj dhe për mua kur i shoh fletoret dhe gjërat që kanë mbetur unë e shoh familjen, vetëm librat dhe pak rroba dhe hiri i tyre në dhomën kur është kryer masakra.
Unë nuk kam pasur për çfarë të jetoj, kur ranë të gjithë, por kur jam kthyer, kam hyrë tek shtëpia dhe i kam dhënë vetes një detyrë dhe një arsye për të jetuar, që të tregojë dikush çfarë ka ndodhur, që të mos shuhet këto që po shuhen, si nga drejtësia vendore, edhe nga ajo ndërkombëtare. Ne po na masakrojnë shpirtërisht, sidomos drejtësia ndërkombëtare.
Asnjë pyetje nuk është marrë.
E dimë që kanë qenë forcat e policisë, por nuk merret askush, nuk flet askush. Nuk jam i kënaqur nëse bëhet drejtësi vetëm për familjen time. Janë 12 mijë njerëz.
A ka një person ndërkombëtar që më flet për drejtësi dhe më thotë që ka drejtësi?!
Fotografitë i kam gjetur në farefis, gjithçka u dogj përveç rrobave në trup./Tvklan
