Dega numër 4 e PD në Tiranë bën publike emrat e 97 delegatëve të cilët kanë firmosur për thirrjen e Kuvendit Kombëtar të PD në datën 11 dhjetor të vitit 2021.
Në total kjo degë ka plot 111 delegatë, ku 92 kanë firmosur për thirrjen e Kuvendit Kombëtar në 11 dhjetor, ndërsa 5 janë në emigracion, sqaruan drejtuesit.
Emrat e firmëtarëve janë lexuar përpara selisë së PD-së nga nënkryetari i kësaj dege, i cili tha se besonin tek lëvizja e ish-kryeministrit Sali Berisha. Kryetarin e PD-ë Lulzim Basha, e cilësoi si humbës.
“Ne kemi caktuar datën tonë duke qenë se ne mendojmë se vendimet e marra nga Basha deri sot kanë qenë në kundërshtim të statutit. Ne nuk jemi kukulla por njerëz që zbatojmë vendimmarrjen e PD-së. Duke qenë se ky është një person që na çon vetëm në humbje, ne besojmë vetëm tek lëvizja e Berishës. Ai duhet të mbronte dhe anëtarin më të thjeshtë të PD jo më themeluesin historik të PD-së, Sali Berishën. Të rregullohet statusi i kryetarit, nuk mund të vazhdojë të emërohet në post në pafundësi. Do diskutohet edhe largimi i Bashës, por kjo nuk do thotë se ai është përjashtuar nga PD, mund të kandidojë si kryetar por të jetë anëtar i thjeshtë”, tha ai.
Dje, dega numër 1 publikoi emrat e delegatëve që kanë firmosur për Kuvendin e 11 Dhejtorit. Edhe më herët, degë të tjera të PD-së kanë publikuar po ashtu listat e firmëtarëve, duke argumentuar se emrat janë zbardhur për efekt transparence.
Më 11 Dhjetor, Kuvendi Kombetar është thirrur nga ish-kryeministri Sali Berisha, pas mbledhjes së firmave të demokratëve. Ndërsa kryetari i PD-së, Lulzim Basha thotë se Kuvendi i PD do të mbahet më 18 Dhjetor.
