Skandal mund të konsiderohet postimi i deputetit socialist Bujar Çela, i cili në ditën e Pavarësisë, ka postuar në rrjet një foto të flamurit kombëtar me foton e diktatorit Enver Hoxha. Si një nostalgjik i diktaturës, Bujar Çela, nuk ka reaguar lidhur me postimin, kur minimalisht duhej të kërkonte ndjesë, ose ta trajtonte si një gabim teknik.
Ky është një rast i paprecedent, kur një deputet provokon shqiptarët duke postuar foton e diktatorit, ndërsa mijëra familje u përballën me persekucionin e regjimit të Enver Hoxhës, ndërsa mijëra shqiptarë sot e kësaj dite nuk dihet se ku prehen.
Foto e publikuar nga deputeti i Ramës, i cili drejton Partinë Socialiste, pasardhëse të PPSH së Enver Hoxhës, dhe në kupolën e së cilës janë angazhuar pinjollët e diktaturës, ka shkaktuar reagime të shumta në rrjet.
Dhe aq më tepër kur deputeti idhtar i Enver Hoxhës ka provokuar kolegët e tij deputetë të Komisionit Parlamentar, duke e shpërndarë mesazhin në grupin whats app, madje edhe me ironinë “Rrituni për Shqipërinë që duam”.
Shqipëria është ndër të paktat vende që ka dënuar formalisht krimet e komunizmit, ndërsa dekomunistizimi i shoqërisë ka mbetur një projekt në kuadrin e llafeve.
