Për biznesmenin Gjergj Luca, skema e asistencës sociale në vend është e gabuar. Sipas tij, shteti s’ka pse të paguajë për “dembelët dhe të pandershmit” – kështu i quan ai personat e papunë.
“Unë mendoj që plaga më e madhe në Shqipëri dhe Kosovë është pikërisht plaga e punës. Kjo plagë e papunësisë, unë mendoj që nuk kurohet me demagogji, por shërohet duke parë të vërtetën në sy. Të shohim të vërtetën që krijon puna. Unë mendoj që gjithë skema, nuk e di për Kosovën, por në Shqipëri, e asistencës sociale është një skemë gabim. Sepse gjithë këto miliona që paguan shteti për asistencën sociale, unë gjykoj dhe e kam thënë përherë, që 90% e këtij kontributi që jep shteti nga taksat tona, nga taksat e atyre grave që kanë kurajo dhe punojnë, që bëjnë jetë sociale, që duan të ecin përpara, që duan të kuptojnë të vërtetën dhe ta shohin në sy. Nuk kanë pse paguajnë për dembelat, nuk kanë pse paguajnë për të pandershmit. Korifeu i letrave shqipe, Fishta, ka thënë një fjalë që mua shpesh herë më janë turr, por është e vërtetë. Ai ka thënë që fukarai është i pandershëm, dhe që të bëhet i ndershëm duhet të bëhet vetëm nëpërmjet punës. Sepse nëpërmjet punës mund të shohësh dhe të kesh kurajo për të parë të vërtetën në sy”, thotë gjatë një interviste televizive Luca, biznesmen i njohur si i afërt me kryeministrin Edi Rama.
Në një nga bizneset e tij në Elbasan, sot u zhvillua takimi i përbashkët i qeverive –Shqipëri-Kosovë.
