Gjykata e Apelit në Tiranë ka lënë në fuqi vendimin e burgimit të përjetshëm të shkallës së parë për Erdet Çapokun, i akuzuar për vrasjen e kunatës së tij Enkeleda Çapoku në janar të 2020 në Paskuqan.
Si ndodhi ngjarja
Enkeleda Çapoku u vra nga kunati i saj në dhomën ku flinte me vajzën dhe nënën, në zonën e Paskuqanit në Tiranë. Ai ka hyrë me dhunë në shtëpinë ku banonte Enkeleda me një shkop dhe një thikë me vete.
Pasi ka hyrë në banesë, autori ka thyer edhe derën e dhomës ku flinin Enkeleda, nëna dhe vajza e Enkeldës dhe është konfliktuar me këtë të fundit. Nëna është futur në mes por nuk ia ka dalë dot të parandalojë ngjarjen e rëndë.
Viktima me urdhër mbrojtje, çfarë deklaroi autori në gjykatë
E ndjera Enkeleda Çapoku jetonte me vajzën e mitur, ndërkohë që kishte marrë një urdhër-mbrojtje pasi kunati e gjurmonte prej kohësh.
Sipas denoncimit të bërë nga e ndjera, Çapoku, e gjurmonte këmba-këmbës, i bënte foto dhe video, pasi pretendonte se e reja ishte “amaneti” që i kishte lënë vëllai për t’u kujdesur, deri sa të dilte nga burgu.
Para togave të zeza, Çapoku ka pranuar krimin dhe shfaqur pendesë, duke shtuar se e kishte marrë inat kunatës duke nisur nga momenti që ajo e kishte denoncuar në Polici për përndjekje.
