Efektivi i RENEA-s, Xhulio Liçi është shpallur i pafajshëm pak muaj, pasi u arrestua në Tiranë për transport të lëndëve narkotike. Liçi u lirua nga akuza për prodhim dhe shitje të lëndëve narkotike.
Operacioni për arrestimin e tij bashkë me dy persona të tjerë Ded Nimani dhe Luan Gaçi u finalizua në maj të këtij viti, kur u sekuestrua edhe 1 kg kokainë.
Gjykata ka vendosur dënim 4 vite e 8 muaj burg ndaj Ded Nimanit, për shkak të dënimit të shkurtuar.
Të tre lëviznin me një automjet. Para hetuesve, por edhe gjatë një ballafaqimi të bërë me Gaçin dhe Liçin, Nimani ka deklaruar se asnjëri prej tyre nuk kishte dijeni për lëndën narkotike dhe çdo gjë ishte organizuar prej tij.
Në këto kushte, prokuroria e gjendur edhe përballë mungesës së provave ka liruar nga akuzat efektivin e RENEA-s dhe Luan Gaçin. Ky i fundit është akuzuar për një tjetër vepër penale, atë të fshehjes së të ardhurave pasi është konstatuar se punonte taksi pa licencë dhe nuk lëshonte kupon tatimor.
