Adoleshenti Kyle Rittenhouse u shpall i pafajshëm nga gjykata për akuzën e vrasjes me paramendim dhe për 4 akuza të tjera, të lidhura me vrasjen e dy personave dhe plagosjen e një tjetri, gjatë trazirave në Kenosha, Uiskonsin.
Vendimi erdhi pas gjyqit që zgjati rreth dy javë, ku Rittenhouse u mbrojt duke thënë se i kishte vrarë ata dy persona për vetëmbrojtje.
“Nuk kam bërë asgjë të keqe. Vetëm sa mbrojta veten”, tha Rittenhouse.
Adoleshenti, i cili në atë kohë ishte vetëm 17 vjeç, mori një pushkë AR-15 dhe iu bashkua një grupi personash të armatosur në Kenosha, në 25 gusht 2020. Aty, Rittenhouse qëlloi me armë zjarri dhe vrau Joseph Rosenbaum, i cili po e ndiqte atë. Kur turma iu vërsul, Rittenhouse vrau edhe Anthony Huber, i cili e goditi me “skateboard”.
Gjithashtu, plagosi edhe Gaige Grosskreutz, i cili ishte i armatosur me një pistoletë.
