Një 30-vjeçar nga Shkodra është ndaluar në vendin e quajtur “Kryqëzimi i Shënkollit” pasi efektivët e policisë i gjetën doza kokaine e kanabisi me vete.
Policia njofton se kishte informacione në rrugë operative për një shtetas që lëvizte me automjet nga Miloti në drejtim të Lezhës, i cili dyshohej se posedonte lëndë narkotike.
Policia lokalizoi mjetin e dyshuar tip “Volkswagen” dhe e ndaloi.
“Gjatë kontrollit fizik të ushtruar ndaj pasagjerit në mjet, shtetasit R. T., shërbimet e Policisë i kanë gjetur lëndë narkotike kokainë dhe cannabis sativa, të ndarë në doza gati për shitje, të cilat u sekuestruan në cilësinë e provës materiale”, informon policia.
“Në përfundim të veprimeve, specialistët për Hetimin e Narkotikëve dhe Trafiqeve të Paligjshme në DVP Lezhë bënë arrestimin në flagrancë të shtetasit R.T., 30 vjeç, banues në Shkodër”, shtuan të njëjtat burime.
