Ish-Kryeministri Sali Berisha ka njoftuar një konferencë të jashtëzakonshme për mediat në orën 19:00 të ditës së sotme.
Konferenca pritet të mbahet në ambientet e Xheko Imperial, ndërsa pritet një reagim i Berishës ndaj propozimit të Bashës për të mbledhur Kuvendin Kombëtar të PD-së jo më 11, por me 18 dhjetor.
Referuar deklaratave të mëparshme, por edhe mbështetjes që ka marrë nga mbi 4200 delegatë të Kuvendit Kombëtar, ish-Kryeministri pritet të rikonfirmojë qëndrimin e tij për të mbledhur Kuvendin më 11 dhjetor, ditën që njoftoi nga Foltorja e Lezhës.
“E ashtuquajtura Kryesi e Partisë Demokratike është jolegjitime. Kjo Kryesi nga 38 anëtarë, vetëm 16 prej tyre të zgjedhur me votën e fshehtë të forumeve të Partisë Demokratike.
22 prej tyre nuk janë zgjedhur siç përcakton statuti me votim të fshehtë, sepse ata janë anëtarë ndaj të cilëve Këshilli Kombëtar s’ka shprehur me votë besimin, praktikisht ata s’janë anëtarë të Partisë Demokratike.
Nuk lejohet kurrë që në anëtarësinë e Partisë Demokratike të ketë maksimumi se 1/5 të emeruar ekzoficion të garantuara këto vende i ka kryetari i organizatës së grave dhe të rinjve. Një Kryesi e emëruar në 60% nga kryetari është turp”, theksoi Berisha.
Ai shprehet se kjo Kryesi është ilegjitime dhe fake por unë tani po punoj për Kuvendin Kombëtar dhe Foltorja si mrekulli e dytë pas Dhjetorit të ‘90 e bëri atë si rast unik.
