Një 47-vjeçare shqiptare u gjet e vdekur në Viserba Monte të Riminit (Itali), të Premten. Siç raportojnë mediat lokale, viktima është bashkëshortja e Sadik Dines, të dënuar me burg përjetë. Dyshohet se gruaja i ka dhënë fund jetës.
47-vjeçarja u gjet e pajetë në banesën ku jetonte nga djali 22 vjeç, i cili kthehej në shtëpi pas pune. Sipas mediave italiane, ajo ishte e shtrirë në dyshemeve me plagë të ndryshme në trup dhe një të prerë në fyt. Banesa ishte e kyçur dhe u hap nga i biri. Apartamenti në katin e parë ku jetonte nuk ishte rrëmujë, pra nuk kishte shenja përleshje. Këndi i plagëve raportohet se është i përputhshëm me goditjet e vetëshkaktuara, ndërsa gruaja ka vajtur më herët nga depresioni. Të dhëna këto që momentalisht të çojnë te pista kryesore – vetëvrasja. Megjithatë, autopsia dhe hetimet pritet të hedhin më shumë dritë rreth ngjarjes.
Viktima ishte e martuar me Sadik Dinen. Ky i fundit ndodhet pas hekurave në shtetin fqinj, pasi është dënuar nga Gjykata e Lartë italiane për bashkëpunim në vrasje, me burg përjetë. Ai akuzohet se ndihmoi nipin Dritan Demiraj, në vrasjen e ish-të dashurës rumune të këtij të fundit dhe partnerit të saj. Sipas mediave italiane, Dritan Demiraj u dërgua në Shqipëri në muajin Janar, për shkak “të paaftësisë cerebrale të papajtueshme me regjimin e burgut”, pasojë e një sulmi të dhunshëm nga një tjetër i burgosur.
