Erigers Mihasi dhe Armando Dumani u ekzekutuan në automjetin tip audi A8 me të cilin po qarkullonin në zonën e Astirit në Tiranë, pasditen e së shtunës.
Autorët e krimit, që ndodheshin në një tjetër automjet, duket se dinin çdo lëvizje të viktimave, ndërsa kanë zgjedhur edhe vendin ku do të realizojnë atentatin.
Nga hetimi i ngjarjes, rezulton se mbi audin A8 është qëlluar në anën e përparme, në derën anësore, ku plumbat kanë përshkruar gjithë hapësirën, por edhe në pjesën e pasme.
Kjo, sipas grupit hetimor, ka ndodhur pasi autorët kanë dashur të sigurohen se asnjë prej personave që ndodheshin në makinë nuk do të shpëtonte.
Viktimat ishin shokë me njëri tjetrin dhe fqinjë në zonën e Yrshekut në Tiranë. Ata po udhëtonin me automjetin tip Audi në pronësi të Mihasit që drejtohej nga ky i fundit, ndërkohë që Dumani ishte pasagjer.
Pak pas ngjarjes në zonën e Thumanës, policia gjeti një automjet tip “Toyota” të djegur ndërkohë që në brendësi të saj u gjetën dy kallashnikovë që dyshohet se janë përdorur nga autorët për të kryer krimin.
