Deputeti demokrat Flamur Noka ka reaguar pas deklaratave të Sekretarit të Përgjithshëm, gazment Bardhi, i cili prej ditësh vë në dyshim, ekzistencën e 4200 formularëve të firmosur nga delegatët e Kuvendit Kombëtar, për zhvillimin e një mbledhjeje të jashtëzakonshme.
Noka në reagimin e tij ka sfiduar Bardhin duke u shprehur se nëse nuk kanë firmosur 272 kryetarë dhe sekretarë seksionesh të PD-së në Elbasan, atëherë ai le mandatin.
“Unë e kam thënë dhe e përsëris që të gjitha firmat do të shkonin në seli dhe në seli janë. Le të dalë Bardhi apo Luli se kush është punonjësi i protokollit. Ne i kemi dërguar tek i vetmi institucion legjitim, përveç Këshillit Kombëtar.
Unë e kam thënë dje dhe e sfidoj sot Gazmend Bardhi. Nëse nuk kanë firmosur 67 % e delegatëve të Elbasanit për të mbledhur Kuvendin, atëherë unë lëshoj mandatin.
Kush të dojë le të shkojë e ti shikojë. 272 kryetarë dhe sekretarë grupseksionesh në Elbasan, kanë kërkuar mbledhjen e Kuvendit.
E sfidoj edhe njëherë që nëse nuk rezultojnë kaq firma, atëherë njëri nga ne duhet të lerë mandatin”, theksoi Noka.
