Një shqiptar është dënuar me burg në Britaninë e Madhe pasi përdhunoi një vajzë të re të dehur në gjumë. Ngjarja ndodhi në Leeds, ndërsa shqiptari i dënuar është 28-vjeçari Ardit Çela.
Sipas mediave britanike, 28-vjeçari e pikasi të renë teksa ajo po flinte në dhomën e një banese ku ishte zhvilluar një festë dhe ishte e dehur.
Sipas hetimeve, e reja është zgjuar në gjendje shoku kur ka vënë re që Çela po kryente marrëdhënie seksuale me të. Pavarësisht thirrjeve për ndihmë, ai nuk ka ndaluar.
Kanë qenë disa persona të tjerë të cilët kanë bërë të mundur nxjerrjen e Çelës nga banesa. Ai u kap më pas nga policia teksa po shkonte në shtëpi me tren.
Shqiptari mohoi sulmin dhe tha se marrëdhëniet ishin kryer në mënyrë konsensuale. Ngjarja ka ndodhur në vitin 2018. Ndërkohë së fundmi, Çela u shpall fajtor.
“Ajo ishte adoleshente me të ardhme të ndritur. Ka ngelur e pasigurt pas përdhunimit. Ka vuajtur nga sulmet e ankthit, e pamundur për të fjetur dhe shëndeti i saj mendor është dëmtuar. Marrëdhënia e saj me të tjerët është ndikuar së tepërmi”, tha gjyqtari Simone Philips i cili dënoi shqiptarin.
Ndërkohë, avokati i tij, duke kërkuar një masë më të zbutur tha, se Çela kishte lindur në Shqipëri, por kishte mundur që të merrte nënshtetësi greke.
28-vjeçari kishte shkuar në Britani në vitin 2017 në përpjekje për t’u bërë infermier, por kishte dështuar për shkak se nuk fliste mirë anglishten.
